“Le Pasquil de la Court, composé nouvellement par M. Pierre de Cognieres, ressuscité, jadis Advocat en la Court de Parlement à Paris.


Au Roy de France, Charles de Valoys IX.
Quis putas puer iste erit ?

Qui penses-tu noble peuple de France,
Qui mettra fin à ton dueil et souffrance ?
Ce sera Charles ton jeune Roy et tendre,
Si Dieu luy fait sa volonté entendre.


A Anthoine de Bourbon, Roy de Navarre.
Accingere gladio tuo super femur tuum, potentissime.

Repren courage, attendu ta hautesse,
Et rens confus tes ennemis sans cause :
Et le certain pour le douteux ne laisse,
Que tost n’advienne ce qu’escrire je n’ose.


Au Prince de Condé.
Ubi sunt qui te accusabant ?

Ou sont allez tous tes accusateurs,
De ton bon zéle faux calomniateurs ?
Le Tout-Puissant leur a rompu les cornes :
Suy donc le droit, et ne passe les bornes.


A la Royne-Mere
Ecce ego, et filii mei quos dedit mihi Dominus.

Par trop cruelle me fust la mort amere,
Lorsque perdi mon support en peu d’heure :
Et bien me prend de plusieurs estre Mere :
Car par cela, en crédit je demeure.


Au Prince de Navarre.
Puer crescebas sapientia et ætate, etc.

Heureux le temps qu’on te verra Roy estre⁸ ;
Heureux celuy duquel tu seras Maistre,
Veu que si-tost tu es sage en jeunesse,
Dieu tel te face quand seras en vieillesse.


Au Pape.
Descendam in infernum fugiens.

De haut en bas en l’infernale fosse,
En gémissant tost me faudra descendre,
Puisqu’on cognoist ma puissance estre fausse,
Et qu’à trop peu mes Bulles je puis vendre.


Au Prince de Montpensier.
Zelum Dei quidem habent, sed non secundum scientiam.

Ce n’est assez que de bon zéle avoir,
S’il n’est conduit par prudence et savoir :
Car fort souvent on est grand zélateur
De ce qui est contre le Créateur.


Au Prince de la Roche.⁹
Quid est veritas ?

Comme Chrestien je desire cognoistre
Le certain but, auquel me vueil remettre;
Mais comme Prince je ne voudrois permettre
Estre abaissé pour Cardinal ni Prestre.


Au Cardinal de Bourbon.
Si cognovisses et tu.

Chacun cognoist que de très-noble race
Tu es issu, et que de prez la trace
Des tiens tu suis en toute humanité :
Mais Dieu te doingt cognoistre vérité.


Au Connestable.
Ecce Adam quasi unus ex nobis factus.

Si tu n’es prince, tu ne laisses pourtant
Par tes hauts faits, de mériter le tiltre :
Prens donc courage, et te monstre constant,
Pour mettre loing ce grand rouge belistre.¹⁰


Au Cardinal de Chastillon.
Velle mihi adjacet sed perficere non invenio.

Honneur et gain me font fort souspirer,
Mais cognoissance me fait moult désirer :
Que si l’on dit pourquoy donc je n’empesche,
Je leur respon que mon chappeau m’empesche.


Au Cardinal de Tournon.
Cum senueris, alius te cinget, et ducet quo non vis.

En mon vieil aage pensant repos avoir,
Tout au contraire ne me fay que douloir,
Voyant ma Robe des Roys tant honorée,
Maintenant estre des petits desprisée.


Au Cardinal de Lorraine.
Quomodo cecidisti de cælo, Lucifer ?

D’où vient que toy, Lucifer, attaché
Au firmament du Royaume mondain,
Es mis au bas, du haut lieu arraché,
Et ta clarté as perdu tout soudain ?


A la Royne Doüairiere.¹¹
Regnum meum non est de hoc mundo.

Par mort et Loy suis mise hors de régne ;
Et laissant France, je retourne en Lorraine :
Trop mieux valloit n’estre si haut montée,
Pour tant subit en estre déboutée.


A Monsieur de Guise.
Tolle grabatum tuum, et ambula.

Veu qu’estranger tu es de ce Royaume,
Que tardes-tu de serrer ton bagage ?
Et que soudain faces place à Vendosme¹²,
Que tu voulois detenir en ostage.


Au Cardinal de Guyse.
Occidite nobis vitulum saginatum.

Qui autre soin n’a qu’à remplir sa pance,
Qui à vertu, et son Dieu point ne pense,
Je dis qu’il est une beste masquée,
Qui plus n’attend que d’estre suffoquée.


Au Mareschal de S. André.
Ubi sunt Dii tui, in quibus habebas fiduciam ?

Où sont tes Dieux ausquels tu t’es fié ?
Régnant lesquels, tu t’es glorifié.
Mieux te vaudroit ton appuy avoir mis
En Dieu, qu’aux Grands de leur Siége démis.


A la Maison de Bourbon.
Vos qui aliquando eratis longè, facti estis propè.

Comme Estrangers, loin vous ont voulu mettre,
Et de l’honneur qui vous est deu, démettre :
Mais le Seigneur par sa forte main dextre,
Eux déchassez, bien fort prez vous fait estre.


A la Maison de Guyse.
Abierunt retrorsum et ceciderunt.

Comme au Jardin, la tourbe meurdriere,
Espouvantée, retourna en arriere :
Aussi sera la Maison estrangere,
Quand se verra de Bourbon chambriere.


A tous les Moines.
Væ vobis.

Mal-heur sur vous, povres mal-advisez;
Mal-heur sur vous, Antechrists desguisez,
Puisque voyez ce que ne vouliez veoir,
Et que chascun désire de sçavoir.


FIN”